Sámis 29

Sámis 29/2019 51 dïhte prinsessa åaraji jïh nahkesti. Dle dohte baernie veedtsi jïh klaasem rïhpesti jïh daennie gærjatjisnie lohki. Dle vihth dïhte ladtetje bööti å dle faavroes jïh fïjne prinsessine sjïdti jïh dle dohte pååjke jeehti: «Gussie akte tjelmie åara, dle åerieh gåabpatjahkh.» — Aereden dle dïhte prinsessa bööti våålese jïh dle altese tjidtjie gihtjie, mejtie naaken lehkesne lea vearadamme dïhte pååjke, jallh mejtie naakenem lea åtneme; men idtji gujht dohte prinsessa maamge utnieh soptsesijstie, ihkie lea gaajhke jïjjem åareme. Mubpien jïjjen edtja dïhte gaskelommes prinsessa ryöjnesjidh, dle dejnie aaj seammalaakan sjïdti, dïhte aaj nahkesti dan jïjjen. Gåalmeden jïjjen edtja dohte jis nööremes prinsessa ryöjnesjidh. Dle vaedtsiejægan aktesne dan prinsen kaammerese jïh klaasem rïhpesti jïh dle daennie gærjatjisnie lohki. Dle dïhte ladtetje bööti jïh dle faavroes prinsessine sjïdti. Dle dïhte pååjke jeehti: «Gussie akte tjelmie åara», dle åajaldihti jiehtedh, «dle dohte mubpie tjelmie aaj åara». DLE DOHTE PRINSESSA duennie mubpine tjelmine vaartesje, ihkie dohte pååjke veedtsi jïh klaasem rïhpesti jïh dle gærjetjem utni, gusnie lohki, dle onne ladtetje bööti dan klaase-raejkien dan kaammerese jïh dle faavroes nïejtine sjïdti jïh dan pååjken bealese åaraji. Dle dïhte prinsessan tjidtjie ïpmerijhketi måarahtovvi dan pååjkese jïh dan mubpien biejjien steelledi fïjne naaloeh jïh dan pååjken kaammeren klaasen uvte bïeji. Dle idtji ’nje dïhte pååjke daejrieh gænnah å iehkeden dle veedtsi jïjtjse kaammerese, klaasem rïhpesti, jïjtjse gærjetjem veelti jïh lohki. Dle dïhte ladtetje bööti jïh dejtie naalojde dabrani. Dle dïhte prinsessan tjidtjie ïpmerijhken feejjen sjïdti, ahte dïhte ladtetje dejtie altese naalojde dabrani. Dle vïenhti edtja dam ladtetjem jaksedh, edtja åadtjodh buvvedh, men idtji ’nje jaksh gænnah. Dïhte ladtetje joe bïesi jïh dle vöölki. MUBPIEN IEHKEDEN DÏHTE pååjke jïjtjse kaammerese veedtsi jïh dennie gærjatjisnie lohki, men idtji ’nje ladtetje vielie båetieh gænnah. Dle ïpmerijhketi sårkose sjïdti, dle vöölki skåakese jïh vaadtsehtje jïh sorkoe. Dle bööti akten balnan, dle vuajnaji, soeve dehtie belneste bööti. Dle oksem rïhpeste, dle båeries, båeries gaelliesskodtje desnie tjahkesjeminie jïh dle buarastahta: «Buaregh, aajja!» Dle dohte båeries gaelliesskodtje ïpmerijhketi ååvese sjædta, ihkie dohte pååjke satnem aajjine buarastehti jïh