Sámis 32

čeahpes giellameaštirii nu ahte álfárot gillojuvvo, iige šat máhte ovddidit iežas áššiid dahje oainnuid, ja dan geažil vuoittahallá ákkastallamis. Dat lea dan lágan gillojuvvonvuohta man vuostá Paulus Utsi váruhii, de dan dihtii son ákkastalai sámi nuoraiguin ahte galget šaddat čeahpi iežaset gielas – sámegielas – muhto maiddá oahppat riikkagiela bures amaset eisevádit beassat sin giellat gielalaččat. DAKKÁR OVDAMEARKKAID MII leat vásihan hui olu maŋimuš áiggiid mas eiseváldit vigget sápmelaččaid ja sámi oainnuid giellat, muhto go sápmelaš dán áigái lea nu čehppon dáro-, ruoŧa- ja suomagielas ahte eise- váldi ii šat birge sápmelaččas gielalaččat, de dat gis lea atnigoahtán lágastallamiid giellan dihtii sápmelačča. Dahje son duođaid lea nu juonalaš ahte bágge sápme­ lačča iežas lágastallagoahtit daid eiseváldiid vuostá geat leat lágaid dahkan suddjen dihtii riikka oainnuid. Dás sáhtášii čujuhit nuppi sámi poehtii gii govve dan dili hui bures; namalassii Áillohaš divttainis “Mu ruoktu lea mu váimmus”, mas son dadjá ná: Dat bohtet mu lusa Ja čájehit girjjiid Láhkagirjjiid Maid sii ieža leat čállán Dá lea láhka ja dat guoská du nai VUOITIT DIKKIS DIEKKÁR eavttuid vuostá duođaid gáibida sápmelaččas hui erenoamáš giellamáhttu ja váikkuhanfámu jus galgá veadjit jáhkkihit duopmá- rii ahte sus dat lea riekta ja eiseváldis boastut. Dat ii leat leaika, ja visot dákkár ákkastallan dáhpáhuv­ vá gielalaččat, ja dábálaččat riikka váldogillii – de ođđa doaba sámi birgenkoansttaid hálddašeames berrešii várra leat ahte láhkagiela lassin oahppat noaiddi vuoibmegiela, go dat dáidá dárbbašuvvot vai duopmárat áddešgohtet sámiid oainnuid, ja sáhttet baicce ieža gillojuvvot sámi retorihkkii – go mii dat gal máhttit sihke bonjastit, beasadit, geažidit ja vaikko guoktiluššat ge, jus dasa šattaš dárbu. Go visot dát gul- let sámi árbevirolaš gielastan-máhttui. Sámis 32/2020 55