Sámis 29

56 Saemeste saaman AKTE SAEMIEN BAERNIE lij såångedeminie akten tjaebpies saemien nïejtese. Såemies aejkien lij vijnem vearadamme åasteme maarhneste, så mïnni dan nïejten gåajkoe jïh såångedi. Dïhte saemien baernie gihtjie dam nïejtem, goh lij vijneste vadteme dan nïejtese jïh dan nïejten eejhtegidie, så gihtjie dam nïejtem: «Mejtie datne munnjien gåmmine (jallh: tjearehkinie) sïjhth årrodh? Så edtjh mannem viehkiehtidh gåetiem tjåadtjoehtidh jïh mov bovtside sujhtedh å buhtjedh.» — «Ij manne daejrieh, mejtie manne sïjhtem dutnjien tjearehkinie årrodh.» Så nïejte eelki jïh edtja vueliem joejkestidh. Så juajka dïhte nïejte: «Ij manne daejrieh, mejtie manne datnem sïjhtem mov gaalline, nov leah gujht maaje tjaebpies.» NÏEJTE JEEHTI JÏH juajka barre ïpmerijhken: «Jis leah datne mov rïektes gaallasassa, munnjien edtjh guksiem darjodh å tjaebpies guksiem jïh treavkah edtjh aaj munnjien darjodh. Goh (gåessie) leah treavkide dorjeme, gåessie dej gujmie båatah å dejtie åadtjoem vuejnedh, så edtjem jiehtedh, mejtie edtjem dutnjien gåmmine årrodh.» SÅ SLUVHTI JOEJKEMISTIE. DIE VÖÖLKI VIHTH dïhte saemien baernie jïjtjse hïejmen gåajkoe å skåakese vöölki, treavkasassah 1 tjoehpi å guksesem. Så guksieh, treavkah darjoej. Goh lij dorjeme, tjaebpies treavkah darjoej å guksieh, så vöölki dan nïejten gåajkoe. Goh dïhte baernie bööti dan nïejten gåajkoe, så vuesiehti dam guksiem jïh treavkide dan nïejtese jïh vueliem joejkesti å jeehti: «Jis ih datne mannem sïjhth dov gaalline, nov golh manne jeenem tjaebpies nïejtem gaa- vnem. Men jis ih datne mannem sïjhth, ih golh datne galkh åadtjodh naaken aejkien pruvredh. Manne leam golh nåejties baernie.» SÅ NÏEJTE SVÅÅRI: «Nov manne datnem sïjhtem, juktie leah munnjien tjaebpies guksiem jïh treavkah dorjeme. Så vuajnam, juktie manne tjaebpies gaallam åadtjoem, tjiehpies leah aaj, manne vuajnam.» SÅ SÅANGOEM JOVKEJIJIN, så provrem hööllejijin. Halász, Ignácz (1887): Svéd-lapp nyelv III: Ume- és tornio-lapp­ marki nyelvmutatványok. Budapest. Sæjroeh 164–166. Daaletje tjaeleme-vuekien mietie Jussi Ylikoski orrestamme. 1 Ole Samuel Elsvatnen «treavkasassah» seamma goh treavkesh jallh treavka-aamhtesh . Jeatjah baakoejgujmie treavkasassa seamma goh daaroen skiemne numhtie goh gaallasassa jallh geellesassa lea mannsemne . Såangoe Ole Samuel Elsvatn