Sámis 29

44 Saemeste saaman Båeries vuekieh – Gosse Tromholten guvvide vuartasjibie, maehtebe jïjnjem lïeredh, Per Ivar jeahta. Maehtebe vuejnedh guktie gaptah gååresovveme. Im manne aerebe dan bïjre ussjedamme. Eelkim voelph jïh slïekth gihtjedh. Dellie eelkim mov klaereldh guvvide gaskevearman bïejedh guktie almetjh åadtjoeh dejtie vuartasjidh jïh mannem raeriestidh. Numhtie manne aaj maahtam mijjen vuekide vaarjelidh. Manne gijhteles gosse dååjresh båetieh boelvide juhtieh. Vuesiehtimmie jïh gærja Jïjnjh saemieh Per Ivar Somby-se tjeelin jïh soptsestin guktie ussjedin gosse dan klaereldh guvvide vuartasjamme. – Mov vaajmoem aejkeste gosse maahtam viehkine dejtie gïeh tjabreme jïjtsh roehtside ohtsedidh. Dellie voelpe mannem stilli vuesiehtimmiem darjodh. Nov hævvi, dæjman gellie stoere guvvieh vuesiehtæmman Saemiedigkesne bööktim, dan mænngan jïjnjh almetjh håjnan sjïdtin gosse idtjin maehtieh vuesiehtimmiem vuartasjidh. Dellie ussjedim mejtie maahtam guvvide gærjese tjöönghkedh? Gellie askh manne dejnie barkim. Nov amma gærjam “Almetjh goeksegi nuelesne” klaereldh guvviejgujmie leam dorjeme, Per Ivar såårne jïh mojjehte.